禾雀亂飛見頂味濃

板塊尋寶：禾雀亂飛見頂味濃 - 王昇

噚日大市高開259點，開市價就係Day High，然後一插到尾。筆者早前估計二萬一會是今次小陽春浪頂，噚日已經沽咗一半貨。下午見到一個奇景，令我心緒不寧，於是再開多張期指淡倉做對冲。見到咩咁驚青？就係股仔禾雀亂飛，神仙股再現。 若非大笨象滙控（005）頂住，昨日大市跌幅肯定有3位數，早前強勢的中移動（941）亦一直走低，反而思捷（330）越戰越勇彈半成。跌市下，居然有47隻股份升一成或以上，升逾兩成的更有10隻，最勁的南海石油（076）飆43%；大凌（211）以全日最高位收，爆升21%；漢基（412）包尾都升20%；至於去年喪跌95%的寶源（692）則有12%進賬。

炒齡有咁上下的老散，大概知道上述股份係咩料，每逢升浪尾聲，正正是素質最差股份爆上之時，毋須特別原因。細價股禾雀亂飛，神仙股亦適時昇仙。新時代能源（166）4日喪飆1.8倍，只因彤叔增持，及可能進一步收購阿根廷兩個勘探油田及潛在開採特權意向書消息。 公司估計阿根廷北部油存量達2億桶輕質石油。

經過蒙古能源（276）事件，筆者對彤叔系股份淆晒底。蒙能前身為新世界數碼，07年初轉型煤炭能源股，股價不足0.20元，落實收購煤礦後，一年半內狂飆逾90倍，最高峯時市值過千億，勁過部份藍籌。 新時代能源極度超買 過去5年，蒙能連一粒煤屎都未有正式向外出售，一直推遲投產時間表，承諾未見兌現，高位接貨散戶輸超過九成。新時代噚日埋單升25%，但如果於全日高位2.22元高追買入，收市賬面要輸18%。 彤叔持有新時代13.3%，市值1.1億元，入股旨在撐姪仔鄭錦超及姪孫鄭明傑，情況一如當年入股蒙能撐愛將魯連城。 炒細價股，食得鹹魚抵得渴，但記住名人效應升得一時，最終會打回原形。新能源講阿根廷項目進度良好，但一日未有油出，一日都係得個殼。現時9RSI已升至97極度超買水平，本周只會出現兩種極端情況，一係再爆升，一係散水喪跌。大家如堅持「二仔底死跟」，惟有祝君好運！

 王昇