大棋局：2015大時代（四）

■人民幣要登上國際舞台，首先要有人用，而且要好多街外人用。

試想像一下，如果美元霸權嘅位置換成人民幣，共產黨就可以千秋萬世。
時代嘅騷動往往伴隨經濟衰退而嚟，因為當經濟唔係太差嘅時候，任何變革都容易引來抵制。大部份人覺得生活過得去，就會認為你嘅改變係多餘兼阻住佢搵食，最多前面加一句「我認同你嘅諗法好崇高，不過呢……」。只有當連睇TVB嘅師奶都覺得生活艱難時，人心先會大規模思變。正如十八世紀如果唔係小冰河時期連年饑荒，法國大革命未必會出現。
過去逃避經濟衰退嘅最好方法，就係搶掠他國財富。但時代進步咗，用槍炮直接搶演化為金融手段。八十年代日本就曾經中伏被美國打沉，日本中伏前以為靠炒地皮可以買起美國一雪二戰之恥，去法國蒙田大道買名牌都大聲啲。如此景象係咪似曾相識？
過去30年中國經濟平均年增長率超過10%，今年GDP預計7.5%，明年會更低。可以預期，人心思變嘅現象只會增大而唔會縮細，而美國所謂經濟復蘇其實亦步履不穩，所以人民幣要搶灘國際化。

人民幣乾坤大挪移

一隻貨幣要登上國際舞台，首先要有人用，而且要好多街外人用，閂埋門只喺自己國內流通無意思。因為當貨幣處於封閉環境，過度印銀紙會造成惡性通脹，津巴布韋就係咁樣。只有當貨幣成為國際級儲備並坐上莊家位置，印銀紙先可以打劫全世界。
貨幣要點樣先可以多人用？第一步當然係從貿易入手，所以人民幣國際化嘅三步係先做結算貨幣，再做貿易貨幣，最後做儲備貨幣。結算等於用人民幣計價，貿易等於人民幣滲透入實體經濟，儲備等於鎖死超印嘅銀紙。可見儲備貨幣係現代金融系統抽鑄幣稅最重要一步。
香港嘅任務係先做離岸人民幣資金池，而且要養大個池。香港人民幣業務由2004年開始，十年過去，已累積超過1萬億人民幣存款。當資金池夠大，先可以推人去借人民幣、發行人民幣債券、喺香港融資拎返去內地、賣人民幣計價理財產品等業務。所以人民幣過去長期升值，因為處於派籌階段，派籌嘅時候如果街外人投資人民幣蝕錢，就唔會一窩蜂擁去換人民幣幫佢建立資金池。所以港紙雖然有升值壓力，但政府官員一定唔敢郁聯繫滙率，因為要成就人民幣大業。
當資金池建立得差唔多，第二步就係滬港通。
滬港通嘅作用係加強人民幣喺兩地流通，旨在超出貿易層面，打入金融層面。人民幣就算成為全世界嘅實體貿易貨幣作用都唔大，因為以美國為例，美元對全世界嘅滲透性，虛擬、電子、金融等層面嘅應用，比實體貿易多四十倍，所以金融先係主菜。其次係內地需要搞番旺A股個場，具體可睇番本欄以往的一文〈A股勿睇得太淡〉*。
當資金池夠大，滬港通開波，如無意外就會取消港人每日兌換2萬人民幣嘅上限。下一步，就係引導內地資金出國，央行官員已表示同新加坡、英國討論緊RQDII（RMB Qualified Domestic Institutional Investor），到時內地資金就可以投資離岸人民幣市場。
RQDII後，就會再推QDRI（Qualified Domestic Retail Investor），即開放內地人可以投資海外股市同地產。搞咁多嘢，最後係希望可以喺海外發行人民幣計價嘅股票、債券，而且用人民幣派息。講白啲，即係要你養成用人民幣習慣。
共產黨係信馬克思，所以要估計其部署，要先了解其思維。馬克思嘅唯物辯證法其中有一點好重要嘅，係認為世事會因量變導致質變。意思係任何事只要持續地做，當個量累積到一定程度時，臨界點就會出現，結果質都開始變化。
可以見到中國其實玩緊乾坤大挪移，人民幣去到唔同離岸市場雖然都唔係自由流通，但離岸市場同中國在岸市場之間嘅資金不斷流轉，如果離岸市場好似蜘蛛網咁不斷增加，最終雖無自由流通之名但已有自由流通之實。
就係呢個時候，美國停QE，美元轉強，日圓貶值。睇住你爭位坐，美國邊有咁順攤？（待續）
*http://hk.apple.nextmedia.com/financeestate/art/20140620/18767666

Mr. Tregunter
註：作者為《地利根德閣》blogger，著作有《樓市撈底攻略》